CHAMELEONE; Akoze ekivvulu n’aweeka Weasle ne Moze nga badding’ana

JOSE Chameleone avudde mu mbeera olwa mutoowe Pallaso okumujeemera bwe yagaanyi okulabikako mu kivvulu mwe yamuyise okumutabaganya ne banne mu Goodlyfe.
Aweese Weasle ne Moze ku mugongo n’abeetolooza siteegi wakati mu kuyimba oluyimba olupya oluyitibwa “The Best I Know” wakati mu nduulu okuva mu bawagizi.
CHAMELEONE ATABUKIDDE PALLASO
Chameleone (Joseph Mayanja) owa Leone Island olwavudde e Bulaaya n’ategeka ekivvulu ku Venom mu Kampala n’ayita aba Goodlyfe okubatabaganya bakomye entalo ze balimu ezaabatuusizza okukubagana wiiki ewedde ne beetuusaako ebisago n’okukoona amadirisa g’ennyumba zaabwe eza Neverland e Makindye ekyavuddeko poliisi okubakwata n’ekuula n’enjaga gye yasanze munda mu kikomera kyabwe.

Chameleone ng’ali ne ba Moze (ku ddyo) ne Weasle (owookubiri ku kkono). Asooka ku kkono ye Bobi Wine.

Mu Goodlyfe mulimu baganda ba Chameleone basatu okuli Weasle (Douglas Sseguya), Pallaso (Pius Mayanja eyeeyitanga Lizard nga tannagenda ku kyeyo) ne AK47 (Emmanuel Mayanja) abali mu kagugulano ne bannaabwe mu kibiina ekyabatuusizza n’okugunjaawo akabinja k’abayimbi akapya ke baatuumye “Team No Sleep” (ekitegeeza Ttiimu eteebaka tulo).

Chameleone ng’aweese Moze.

Chameleone yatuuse ku Venom ku ssaawa 7:00 ez’ekiro n’asooka okuwayaamu ne bayimbi banne okwabadde BobiWine ne mukazi we Babie era mu kaseera katono Moze (Moses Ssekibogo) owa Goodlyfe n’amuloopera Pallaso nti yamukuba eng’uumi ku mimwa era ne yeewaana.
Okumanya eng’uumi eno yasonsomola Moze, enkeera yanyumizaako banne nti: Ndabye abakubi, naye Pallaso mukubi!

Weasle ne Chameleone nga bayimba.

Chameleone yabadde yayise enjuyi zonna ezirina enkaayana mu Goodlyfe kyokka Pallaso n’atajja; era Moze olwamaze okwanja ensonga, Chameleone yazzeemu okumukubira ku ssimu essaawa eyo wabula nga tazikwata ekyanyiizizza Chameleone n’agamba nti kano akalaba ng’akabonero k’obunyoomi kyokka n’asuubiza okumugolola ettumba.
Oluvannyuma Pallaso yagambye nti wadde assa ekitiibwa mu mukuluwe Chameleone, alina Maneja Jeff Kiwanuka gw’alina okusooka okufunako olukusa nga tannaba kusisinkana bayimbi balala naddala ng’ekifo we baagala abasisinkane waliwo ekivvulu.
Moze alumiriza Jeff okwekobaana ne Pallaso, AK47, Allan Kiwanuka ne bannaabwe okutemaatema mu Goodlyfe oluvannyuma lwa Moze ne Weasle okusalawo okuggyako Jeff obuvunaanyizibwa bwa Maneja ne babuwa Chagga (Geoffrey Kyagambiddwa).
Bagamba nti Jeff ali mu kuperereza Weasle yeekutule ku Moze, kyokka bino Jeff agamba nti babimusibako busibi.
Chameleone yakkakkanyizza Moze, Weasle ne Chagga n’abategeeza nti agenda kufuba okwogerako ne Pallaso ne Jeff abakakase nti beetaaga okutambulira awamu bave mu ntalo era n’alabula nti bwe banaaguguba waakubeesalako aleme kuddamu kukolagana nabo mu by’emiziki; wadde nga bonna bayise mu mikono gye.
Yagambye nti agenda kutandika kampeyini evumirira abayimbi abeerwanya akunge n’abantu obuteetaba mu bivvulu bye baba bategese okutuusa nga beetonze.
Chameleone y’omu ku baludde nga bawulirwa mu ntalo, kyokka yategeezezza nti bino abawagizi bibanyiiza nnyo era naye teyakoma ku kubivaamu wabula atandise n’okubivumirira.

Abamu ku badigize abeetabye mu kivvulu.