Omubaka Nsereko bamukwasizza ttiimu ya Victoria mu butongole

OMUBAKA wa Palamenti owa Kampala Central, Haji Mohammed Nsereko akwasiddwa ttiimu ya Sports Club Victoria University mu butongole mu maaso ga bannamawulire ku Sheraton Hotel.
Abadde nnannyini kiraabu, Simo Dubajik ye yamukwasizza omujoozi akawungeezi nga January 30 nga baasoose kulambula bazannyi mu kutendekebwa kw’oku makya e Namboole.
Mu kwogera kwe, Nsereko yagambye nti tasobola kuggyawo kya kufuuka Pulezidenti wa FUFA gye bujja wabula nga kati essira akyalitadde ku ttiimu ya SCVU gy’ayagala esukkulume ku mutindo gw’agisanzeeko.
“Dubajik abadde addukanya ttiimu ku mutiindo gwa Bulaaya era tumusiima okutuusa omupiira gwa Uganda ku mutiindo. Tujja kwongera okugyagazisa abantu era nsuubiza nti tetujja kusalwako kudda mu Big League,” Nsereko bwe yategeezezza.
Yagambye nti ekyamugaanyi okugula ttiimu za Super ze yali asoose okukansa lwa SCVU kuzisinga nzirukanya.
Nsereko adde yagaanyi okwatuukiriza ssente ze yasasudde naye ensonda zigamba nti yasasudde obukadde 100 nga zino bye bitundu 70 ku buli 100 ku migabo gye yatutte.
Abadde nnyiniyo, Dubajik yategeezezza nti waakusigala ng’ayamba omupiira gwa Uganda ne SCVU gy’asigazzaamu emigabo 30 ku buli 100 wabula nga tali mu bukulembeze bwayo butereevu.
Mu birala Nsereko bye yasuubizza kwe kwongera okufuna abassa mu kiraabu ensimbi n’okugaziya abawagizi nga bagula kaada z’obwa mmemba.
Nsereko ne Dubajik baggumizza ababadde bakolera kiraabu nti ebitongole tebijja kusattululwa wabula ebimu biyinza okukyusibwakyusibwamu.
Ttiimu egenda kwanjula abasambi mu bbanga ssi ddene.